Амьдрал сайхааан ... Амьдралын амтыг мэдэрч амьдрах бүр ч сайхааан

Өчигдөр 3-р сарын 9-ны Ням гараг байлаа. Мэдээж энэ өдөр Оогийноо, амласан ёсоороо найзуудынхаа хамт Яармагийн Бадамлянхуа төвийн хүүхдүүдтэй Богд уулын нэгэн оргилыг зорин алхасан юм. Урьд өдөр нь, Урт Цагааны номын захаас, ном авч заншсан эгчээс хэдэн ширхэг үлгэрийн номыг худалдан авсан билээ. Сүүлийн өдрүүдэд санхүүгийн жаалхан хямралтай байгаа учраас ийш тийш таксидах, найзуудтайгаа зугаацах мөнгөө хагаслан байж хэдэн ном авсан нь цүнхэн дотроос халуу дүүгэн төөнөж, номнуудаа хурдхан шиг аваачиад шүлсээ хаттал, жавьжаа чилтэл үлгэр унших юмсан гэж яарч байсан юм.



Өдрийн 12 цагийн үед Бадамлянхуа төвийн үүсгэн байгуулагч, захирал болох Австрали эмэгтэй Диди (энэ бол санскарит нэр бөгөөд Монголоор “Эгч” гэсэн утгатай ажээ), Хаан банкны нэг эмэгтэй, сургагч багш нартай Богд уул руу алхлаа. Оогийноо, хоёр бяцхан охинтой хөтлөлцөн явах зуур, өөрийнхөө хүүхэд нас, ямар ажил хийдэг, мэргэжилээ яагаад сонгох болсон гэхчилэнгээр ярьж, харин хүүхдүүд хариуд нь том болоод ямар хүн болох тухай, ямар хичээлдээ дуртайгаа, мөрөөдлөө гээд л амь уралдан шулагналдсаар нэг мэдэхэд нилээн өндөрт модны хаяанд ирсэнээ мэдлээ.





Нарны ээх илчэнд уясан хайлж ханзарсан цас, цасны усанд зөөлрөн дэвтсэн хөвдөрхөг хөрс, нарны гэрлээс имээн модны сүүдэрт нөмөрлөн хорогдсон цагаан цас, амьдралд тэмүүлэх зулзгана ногоон өвс энэ бүгд хавар ирсэнийг илтгэнэ. Жигүүртэн шувуу хүртэл модны оройд үүрээ засан тухалжээ.





Бадамлянхуа төвийн захирал, Австрали эмэгтэй санскарит нэртэй болохыг би дээр дурьдсан. Энэ нь түүнийг иога, бясалгалаар хичээллэдэгийг нотолж байгаа биз.
Ойн намуухан цоорхойд бид түр саатан, зөөлөн хөвдөн дээр замбилан суугаад 20 минут бясалгал хийсэн юм.

Нүдээ аниад, анхаарлаа сэтгэлийн чанд руу чиглүүлэн ажааран суухад холын тэртээх тоншуулын чимээ сэтгэлийн үүдийг тогшиж, нэр нь үл мэдэх шувууны жиргээ, зөөлөн хөрснөөс өндийн ургах зулзгана ногооны зүрхэний лугшилт, модноос модноос, мөчирнөөс мөчир дамжин саатсаар хацар дээр ирэн буух хаврын уяхан салхины үнсэлт сэтгэлийн минь гүн руу шинэ эрч хүч, хүсэл тэмүүлэл, шинэ мэдрэмж, шинэ амьдрал шинэ бүхнийг ганцаарчилан шивнэх шиг санагдсан.

Нүдээ нээн орчиноо ажиглахад Оогийноо өөрийгөө ирж буй хавартай, зулзган ногоотой ижилсэн, амьдрал өөд улам ихээр шунан тэмүүлэх шив шинэхэн ООГИЙНОО болсоноо мэдэрч байлаа.
Амьдрал ямар сайхан юм вэ …. Амьдралын амтыг мэдэрч амьдрах ямар сайхан юм вэ гээд орилмоор, уулнаас уул дамжуулан, үүл үүлнээс рүү өндөрөөс өндөрт тэнгэрийн үл мэдэх хязгаар хүртэл тэнхээ мэдэн орилмоор санагдлаа. Тэрхэн зуур, ООГИЙНОО-нд элгэмсэгээр элэгсэх бяцхан хоёр дүүгээ барьж аваад үнсэхэд өнөөх хоёр нь ихэд гайхсан янзтай том гэгч харав.
ООГИЙНОО ямар азтай гээч. Хүүхэд насанд амьдрал ООГИЙНООД хатуу хандан нүүрээ буруулсан мэт санагдаж байсан саяхан боловч, сайхан сэтгэлтэй томчуудын хайраар хүмүүжин, өнөөдрийг хүртэл дандаа сайхан сэтгэлтэй, сайн хүмүүстэй таарч байсан нь түүнийг өдий зэрэгтэй хүн болгосон юм.
Өөрт нь учирсан сайхан хүмүүсээс амьдралыг хайрлаж болдогийг, амьдралд дурлан тэмүүлсэний хариуд хүсэл тэмүүлэл түүнд жигүүр урган нисэн ирсэнийг мэдсэн билээ.
Одоо тэр бусдын хайрыг, бусдын тусламжийг харж биш бусдад хайр түгээж, бусдад гараа сунгах насандаа хүрсэнээ энэхэн зуур улам ч бүр ойлгосон мэт.
Хүмүүс түүнд амьдралыг хайрласанаар жигүүртэн болж нисдэгийг ойлгуулсантай адилхан тэр одоо өөрөө эдгээр бяцхан хүүхдүүдэд амьдралыг хайрлахыг зааж өгөх хэрэгтэйгээ ойлгоод байх шиг.

Үүний тулд өөрийгөө яаж өөрчлөх ёстой вэ?

Өөртөө тавьсан энэ асуулттай зэрэгцэн Дармапада буюу Бурханы Номын найман мөрт, салхиар өртөөлөн сэтгэлд ийнхүү аминчлан шивнэлээ.

Эхлээд өөрийгөө зөв мөрт
Эгнэгт бат оруулж яв
Өрөөл бусдыг үүнийхээ дараа
Өөд татвал зовлонд унахгүй

Өрөөлд тустай байлаа гээд
Өөрийгөө битгий гаргуунд хая
Өөдөлж дэвших замаа чиглэж
Өнөд түүнээ баттай зорь

Тийм шүү. Ямар үнэн хэлээ вэ. Эхлээд ООГИЙНОО өөрөө атаатны өмнө гэгээрэгч байх, хатуугийн өмнө зөөлөн байх, сэтгэлээрээ, оюун санаагаараа, боловсрол мэдлэгээрээ, үзэмжит зөв төрхөөрөө сайн сайхан болох суурийг баттай тавих ёстой юм байна.

Энэ бүхнийг ойлгуулахын тулд хэсэгхэн зуурын цаг завыг энэ асрамжийн газрын хүүхдүүдтэй холбож өгөө вэ гэж өөрөө өөрийнхөө хувь заяанд баярлан талархаж байлаа. Яагаад ч юм, ООГИЙНОО энэ Бадамлянхуагийн хүүхдүүдтэй уулзаад гэр лүүгээ явах замдаа өөр өөрийгөө шинээр нээж, тэднээс шинээр суралцаад байх шиг санагддаг юм.

Харин энэ удаад тэдэнд туслахын өмнө өөрийн зөв баттай суурийг сайтар тавих ёстойгоо ухамсарлан ойлгож, яг одоо өөрт байгаа үнэтэй бүхнээ харамгүй зөв хайрлаж, хүндлэхээс эхлэх ёстойгоо ойлголоо.

Тиймээ би азтай юм. Яг одоо ООГИЙНООД хэзээ ч урван буруулахгүй гарын таван хуруунд багтах ахан дүүс, өдий зэрэгтэй асран хүмүүжүүлсэн хамаатан садан, хайртай эмээ, өдөр бүр хамгаас дээд аз жаргалыг бэлэглэн байдаг дүүгийн алаг бяцхан үр, хэзээд үнэнч сайхан найз нөхөд, өөрийн болгохыг чармайж яваа мэргэжил гээд юм бүхэн байна шүү дээ.
Юун түрүүнд, бусдад гараа сунган туслахаас өмнө тэр болгоныгоо улам ихээр хайрлаж, эрч хүчтэй амьдрах хэрэгтэй юм байна.

Одоо цэл залуухан байна. Мөрөөдлөө биелүүлэхээр төлөвлөсөн хугацаандаа хүрэхэд ООГИЙНООД таван жил байна. Харин энэ таван жилийн дотор боловсролоо улам бүр дээшлүүлж, үнэтэй гэсэн бүхнээ улам их хайрлах ёстой юм байна.
Амьдралд илүү их шунан тэмүүлэх энэ үед ч мөн амьдралыг бэлэглэгч хавар өөрөө хүрээд иржээ.

ХЭХЭ иймээс ойрын ирээдүйд хийхээр төлөвлөсөн зорилгодоо хүрэхийн тулд өнөөдрөөс эхлээд өглөө эртлэн босохоо нэг цагаар урагшлуулан таван цагаас босож, өглөө бүрийн ургах нараар гэрчлүүлэн 30 минутыг гэр бүлийнхээ, өөрийнхөө, хүүхдийн сайн сайхны төлөөх залбирал, бясалгалаар эхлүүлж байх болно.

Энэ таван жилийг гүйцэх хором бүрийг алдахгүйн тулд ООГИЙНОО өмнөхөөсөө ч илүү их хөдөлмөрлөх ёстойгоо бяцхан дүү нарынхаа тусламжтайгаар ойлгосон шүү.

Бадамлянхуагийн бяцхан жаалуудын ирээдүйгээ сайхнаар төсөөлөн байгаа хүсэл мөрөөдөл, тэднээс ООГИЙНООд хандан сацарч байдаг эерэг энерги нь, бяцхан дүү нарынхаа ирээдүйд дэм өгөн туслах ООГИЙНООгийн тэмүүлэл болж байна.

Иймээс назгайран удааширах эрх байхгүй ээ. Иймээс, энэ бичлэгээ ООГИЙНООгийн дуртай ширээний ном болох Ким Ү Жүний “Хорвоо дэлхий уужим хийх ажил их байна” хэмээх сайхан номноос иш татан өндөрлэе.

“Цагийг хайрлаж гамнаваас зохино. Тухайн цаг ганц л тохиолдоно. Ганц удаагийн юм болгон үнэ цэнэтэй байдаг жамтай. Залуу ахуй үеийнх шиг цаг хугацаа нас сүүдэр хэвийсэн хүмүүсээс 3, 4 дахин илүү үнэтэй байх ёстой. Яагаад гэвэл залуу насаа яаж өнгөрөөснөөс цаашдын амьдралын утга учир, тэр хүн хир зэрэг явах нь шийдвэрлэгддэг учраас тэр.