Нээх сайхан бас гоё


НИГҮҮСЭЛ, ТЭВЧЭЭР, БОДЛОГОТОЙ байх явдал хүмүүст маш чухал хэрэгцээтэй зүйлүүд юм.
Тийм учраас хүндрэл гарах үед эдгээр шинж чанарыг өөртөө хөгжүүлэх хэрэгтэй.
Харин хэн тийм боломжийг бий болгодог вэ?
ДАЙСНУУД
Тэд л бидэнд гай зовлон авчирдаг.
Тийм учраас ямар нэгэн зүйлд суралцахыг хүсвэл ДАЙСНАА хамгийн сайн БАГШАА гэж бодох хэрэгтэй.
Тэд л бидэнд хүлээцтэй хандах, сэтгэлийн тэнхээтэй байхыг сургадаг.
Үүнээс гадна, хувийн болон нийгмийн амьдралд дайснууд ч гэсэн тухайн нөхцөл байдлаас шалтгаалан найз нөхөд болдог тохиолдол байдаг.
Үерхэл нөхөрлөлд хүрэх хамгийн сайн зам нь НИГҮҮСЛЭЭР ДАМЖСАН ЗАМ юм.
Элэгсэг дотно сэтгэл л хүмүүсийг хооронд нь хамгийн сайн найз болгож чаддаг.
Бусдыг халамжилж, тэдэнд тусалж, үйлчилж, тэдний сайн сайхны төлөө санаа тавьж, аль болох олон найз нөхөдтэй болж, болж өгвөл үргэлж инээмсэглэж байх хэрэгтэй.
ТУСЛАМЖ БОЛОН ҮЙЛЧИЛСНИЙ ҮР ДҮНГ ХЭЗЭЭ Ч БОДСОНЫ ХЭРЭГГҮЙ.
Үүний үр дүнд тусламж шаардагдсан үед туслах хүн маш олон гарч ирнэ.
Өнөөгийн нийгэмд танд эрх мэдэл, мөнгө байсан цагт найз нөхөд хангалттай мэт санагддаг.
Гэвч энэ бүхний үр дүн бий болсон найз нөхөд бол жинхэнэ биш ЗҮГЭЭР Л ТОЙРОН ХҮРЭЭЛЭГЧИД юм.
Та өөрийн эрх мэдэл, эд баялагийг алдсан цагт эдгээр нөхөд чинь өдрийн цагт дэнлүү бариад явсан ч олдохгүй.
Хамгийн гол зовлон бол бидний өдөр тутмын амьдралд сайн сайхан явж байгаа цагт бидэнд ямар ч найз нөхөд хэрэггүй мэт бид өөрсдөө бүгдийг хийж чадах мэт санагддаг явдал.
Гэвч байдал бишдэж, бие өвдсөн цагт л бид өөрсдийн алдааг ухаардаг.
Тиймээс энэхүү цаг үед биеэ бэлдэхийн тулд ямар ч цаг тусалж дэмжих жинхэнэ найз нөхөдтэй байх нигүүсэлийн үрийг тарих хэрэгтэй.
Би маш олон найз нөхөдтэй болох дуртай. Би үргэлж инээмсэглэж явдаг. Тиймээс миний өмнө хэрхэн шинэ найз нөхдийг олох вэ? яавал аль болох чин сэтгэлээсээ инээмсэглэсэн хүмүүстэй байнга учирч явах вэ? гэсэн бодол байнга байдаг.
ИНЭЭМСЭГЛЭЛИЙГ ЯАЖ ТӨРҮҮЛЭХ ВЭ?
Хүмүүс ч гэсэн тэр бүр адилгүй олон янзаар инээдэг.
Тэдний зарим нь ёжилсон янзтай, зарим нь албархуу хийгээд хиймэл инээдэг хүмүүс ч цөөнгүй бий.
Эдгээр инээмсэглэл баяр баясаглан эсрэг этгээддээ аваачихгүй бөгөөд харин буруу сэдэлийг төрүүлдэг.
Үнэн сэтгэлээсээ инээх нь цоо шинэ итгэлийг буй болгодог.
Хэрвээ бид жинхэнэ инээмсэглэлийг хүсвэл хамгийн түрүүн бидний хийх зүйлс инээмсэглэлийг төрүүлэх үндсийг тавихад оршино.
Тэгвэл хэрхэн сайн найз нөхөдтэй болох вэ?
Мэдээж хэрэг үзэн ядаж муудалцсанаас бол болохгүй. Жинхэнэ нөхөрлөл бол чин сэтгэл, хамтын ажиллагааны үндсэн дээр бий болох хийгээд энэ нь танд нээлттэй сэтгэл, халуун зүрх байх ёстой гэсэн үг юм.

Дээрхийн Гэгээнтэн, 14-р Далай Ламын сургаалиас
Ахын блогоос авав.

Талархал

Мика маань блогчдын уулзалтын талаар бичлэг оруулсан байна лээ. Би бас хэд гурван үг хэлий гэж бодлоо.

Би зүгээр л талархана. Блогчдын холбоог байгуулсан бүх найз нартаа тэр дундаа сэтгэл гарган ажилласан Мика, Зараа, Обод, Амарсайхан ах, Уянга мөн блогчдын уулзалтанд ирээгүй ч блогчдын дунд Ойр Алс гэсэн сайхан санаачлага гарган ихийг хийж бүтээхийг чармайж байгаа Ганга эгчдээ гээд бүхий л залуусдаа ТАЛАРХАЖ байна.
Тэр дундаа Блог ертөнцөөс төрсөн Монгол Хүүхэд Санаачлагийн тухай нулимс унагам, сэтгэл хөдөлгөм сайхан илтгэл тавьсан МӨН Блог ертөнцийн хамт олны оюуны охиос гарч буй “Зөвлөх Зөгий” сэтгүүлийг санхүүгийн болоод бүхий л талаар дэмжин ажиллаж байгаа "New Expert" компаний зангаргатай захирал УУГААНААДАА талархаад талархаад барашгүй ээ.
Сайхан бүхний төлөө ХАМТДАА

Гал зүрхшээх гайхамшиг

1922 оноос ноцож эхэлсэн их хэлмэгдүүлэлтийн гал 1930-иад оны үед ид дүрэлзэж, айл бүрийг гашуун нулимсанд живүүлж, олон зуун сүм хийд, дуганы шатаж буй утаанд тэнгэр харанхуйлсан он жилүүдэд цөвүүн цагийн аймшигт үнэнээр хуйларсан хэлмэгдүүлэлтийн шуурга халдаж зүрхлээгүй цорын ганц хийд бол Чойжин Ламын сүм музей юм.

Нийслэл хотын чанх төвд чимээгүйхэн хэрнээ ихэмсэг дүнсийх энэ сүмд анхны долоо гэгдэх Бодоо, Данзан, Сүхбаатар, Лосол, Чойбалсан, Догсом, Амар нар Монголын төрийг хамгаалагч Улаан Жамсран бурханы өмнө мөргөж хурууныхаа өндгийг ханан модон тагштай сүүн дээр цусаа дусаан хүртэж тангарга өргөн “нам нуугдаж, сэм нийлье” гэмээн Ардын намыг байгуулж, аугаа үйл хэргийг эхлүүлсэн бөгөөд манай үе үеийн төр, нийгмийн нэрт зүтгэлтэнүүд “ах” нарын нүд харуулдан нууцаар ирж сүмийн шүтээнд мөргөн залбирч төрийн хэргийг зөв тийш нь залж чиглүүлэх адислалыг гуйн залбирдаг байсан гэдэг.
Хожим хувьсгалын үйл хэрэг бүтэж их жанжин Д.Сүхбаатар Нийслэл хүрээнд ирээд Чойжин ламын музейн хойно /хожим тэр газар 1925 онд Сүхбаатарын талбайг байгуулсан/ ард түмэндээ үг хэлж, түр засгийн газраа ч мөнхүү сүмийн хойно байгуулж байсан юм. Хожим 1951 онд Засгийн газрын ордныг сүмийн чанх хойно барьсан нь муу зүгээс ирэх аливаа хорлолоос Монголын төрийг Чойжин Ламын сүм, чойжин сахисууд хамгаалж байдаг гэсэн утга агуулагдаж байгаа бөгөөд эдүгээ Төрийн хүндэтгэл ёслолын ордны төв хэсэгт намирах төрийн далбаа Чойжин ламын сүм музейн Гол Сүмийн алтан ганжиртай нэг шугаманд давхцсан байдаг нь тохиолдлын хэрэг биш буй за.

Өдгөө нэг сая хүнтэй түм түчигнэн бум бужигнасан Улаанбаатар хотод өдрөөс өдөрт нэмэгдэн өндийх шил толь мэт өндөр барилгуудын сүүдэрт нар “үгүйлэн” намбайх Чойжин ламын сүм музей халдашгүй дархан, дуусашгүй баялаг, сүрдмээр ихэмсэг, үнэн гайхамшиг юм.
Илүү сартай хаврын хахирган өдөр Чойжин ламын музейн хашаагаар ороход зуны мишээх нар ганцхан энд онцгойлон тусаж байна уу даа гэлтэй сэтгэгдэл төрж байлаа. Услаж тордсон хөрс, чийг үнэртэн нар амтлан дэлбээлэх моносын модод, дардан зассан чулуун зам ... шувуун жиргээнд хөглөгдөж, шившээ салхинд үнсүүлэхэд зөөлөн агаад түмэн амарлингуйг их хотын үймээнт амьдралын тэхий дунд мэдрэх нь чилж ядарсан шуугиант хотын хүмүүн надад сонин хийгээд гайхамшигтай санагдана.
Сүм музейн босгоор хөл тавьсан даруйд миний бие 21-р зуунаас 19-р зууны эхэн рүү, их түүхийн дуусашгүй гайхамшиг руу хөл алдан орлоо. Зуун наст Чойжин ламын сүмийн сүрлэг нууцлаг ертөнц надад ийнхүү шивнэлээ:

Чойжин Ламын сүмийг анх 1889-1902 онд ард түмний хандив тусламжаар Зүүн Хүрээнд Монгол улсын сүүлчийн Эзэн хаан, Шашин төрийг хослон баригч, наран гэрэлт, түмэн наст VIII Богд Живзундамба хутагтын төрсөн дүү, Монгол улсын төрийн их Чойжин, хар зүгийн тэрсүүтний омгийг дарагч Лувсанхайдавт зориулан Их хүрээний нэрт уран барилгач Омбын удирдлаган дор бүтээжээ. Чойжин ламын сүм нь Монголын төрийг хар зүгийхнээс хамгаалж, төрийн мэлмийг гийгүүлэх увидастай учир Манжийн хаан сүмийг барихад ихээхэн дургүйцэж байсан гэдэг. 1903 онд Зүүн хүрээн дэхь Чойжин ламын сүм учир битүүлгээр шатсан түүхтэй.

Чойжин лам буюу Лувсанхайдав нь урд хойдохыг харах билэг оюун төгс нэгэн байсны учир цөвүүн цаг ирэхэд соёлын үнэт дурсгалт зүйлсийг хамгаалан авч үлдэх хувь зохиолтой сүмийг барьж байгуулах нь нэн чухал гэж үзэн удаах жил нь буюу 1904 оноос эхлэн Чойжин ламын сүмийг барих ажлыг яаравчлуулсан байна.
Төрийн хэргийг дээлийн ханцуйд шивнэлдэн, сүүдрээ хүртэл хардаж байсан цэвүүн цаг байсан тул Лувсанхайдав буюу Чойжин лам өөрийн хөрөнгөөр хоёрхон жилийн дотор сүмийг барьж, дотоод заслыг эхлүүлсэн байна.
Гэвч Манжийн хаан, Монголын төрийг хамгаалан Чойжин бууж байх сүм хийд барихыг зөвшөөрөхгүй, сүмийг нураах, ажлыг зогсоох явуулга хийн, тэр ч байтугай Монголын эрх бүхий хүмүүсийг дарамталж байжээ.
Энэ үед Лувсанхайдав лматан уран арга, ов мэх хэрэглэн Манжийн хааны толгойг эргүүлж чадсан гэдэг. Тэрбээр 1906 онд Манжийн хаанд өргөн барьсан бичигтээ “Манжийн хааны түмэн өлзийг бататган, шашин төрийн өмнөөс чойжин бууж, эх болсон хамаг амьтны тусын тулд залбирал үйлдэж, өдөр бүр ном хурах учир өөрийн хүчин чадал, ард түмний дэмжлэгээр 55 тасалгаа бүхий сүмийг барьж босгов. Таныг урт удаан наслах, манжийн төрийг өнө удаан оршуулах үүднээс чойжин бууж байх тул нэр хайрлахыг хүсэн, есөн цагааныг бэлэг болгон хүргүүлж байна” хэмээн бичжээ. Энэ бичигт урамшин хөгжсөн Манжийн Бадруулт төр хаан “Өршөөлийг хөгжүүлэгч сүм” хэмээх нэр шагнан олгожээ.

Ийнхүү Монголчуудын сүлд хийморь ивээсэн завшаанаар 1908 онд Чойжин ламын сүм үүдээ нээсэн байна. Монгол төр шашныг хослон баригч, Нарангэрэлт түмэн наст VIII Богд Жибзундамба хутагт “Хар зүгийн шулмасын аймгийн омгийг дарагч, их амгалангийн урвалтгүй зүтгэн бүтээсэн орд харш” хэмээн нэрлэж Зэмэр, Найчин, Дорж шүгдэн хэмээх гурван Чойжингийн өмнөөс Чойжин буудаг, төр шашны нууц үйл ажиллагаа явуулдаг эгэл ардад хаалттай сүм болгожээ.

Иймд Чойжин ламын сүмд зөвхөн төр, шашины зүтгэлтэнүүд саатан морилж, төрийн их сахиус шүтээнд мөргөн залбирдаг, харин эгэл ард түмэнд хаалттай газар байжээ.

Үг ярих бүү хэл амьсгаа авахад бэрх хэлмэгдүүлэлтийн он жилүүдэд Монгол орон даяар сүм хийд, дугануудыг үүд хаалгыг хааж, галдан шатааж, түүний дотор байсан судар ном, бурхан тахил, бичиг соёлын үнэт дурсгалыг устган үгүй хийж байсан хүнд бэрх цаг үе байлаа.

Энэ үед монголын нэр бүхий сэхээтнүүд шашин, соёлын үнэт эд өлгийн зүйлийг аймаг хошуудаас цуглуулан Чойжин ламын сүмд төвлөрүүлээд, төрийнхөө дээд байгууллагад албан ёсны бичиг хүргүүлсэн байна. Энэхүү бичигт Чойжин ламын сүмд Монгол урчуудын ур ухаанаа шингээн бүтээсэн түүх соёлын үнэт бүтээлүүд хадгалагдан буй учир төрийн хамгаалалтанд авахыг хүссэн байдаг.
Орос ахын нүднээс буруулж, 1939 онд Чойжин ламын сүмийг улсын 1-р зэргийн хамгаалалтанд авсны ачаар өвөг дээдсийн маань соёлын үнэт дурсгалууд бидний үед өвлөгдөн ирсэн түүхтэй. Чойжин ламын сүмийг хамгаалахад Маршал Чойбалсан онцгойлон анхаарч байсан гэдэг. Учир нь Чойбалсан, Чойжин буух эрдэм чадлыг эзэмшсэн Бодоо ламын гэрт өсөн хүмүүжсэн төдийгүй түүний өргөмөл хүү байснаас гадна дээр өгүүлсэнчлэн хувьсгалын үг яриаг энэхүү сүмд нууцхан шивнэсэн анхны долоогийн нэг байсан билээ.

1942 онд Чойжин ламын сүмийг “Шашны түүхийн музей” болгосноор 1969 он хүртэл судалгаа шинжилгээний ажил хийх, тусгай зөвшөөрлөөр гадаадын төлөөлөгчдөд захиалгаар үйлчилдэг хаалтай музей байсан юм. Харин 1962 онд Чойжин ламын нууцлаг ертөнц эгэл ард түмэндээ анх үүд хаалгаа нээснээс хойш Чойжин ламын сүм музей гэж нэрийдэх болжээ.

Чойжин ламын сүм нь Монголын төрийг муу зүгийн ад зэтгэрээс хамгаалах ариун дагшин газар төдийгүй соёлын хосгүй үнэт бүтээлүүдийг түүхийн нугачаанаас аварч гарсан гайхамшигт орд юм. Чойжин ламын музейд хамгаалагдан хадгалагдсан үнэт зүйлсүүдээс Богд хааны ордон музей, Занабазарын дүрслэх урлагийн музей, Улсын төв номын санд шилжүүлэн сан хөмрөгийг нь баяжуулсан юм. Тухайлбал IV богдын Түвдээс авчирсан 108 боть Ганжуур ном Лхашидын тарни гүн ухаан, анагаах ухааны бүтээлүүдийг багтаасан Түвдийн гар бичмэл 226 боть Данжуурыг /номыг XVI зууны үед Монгол хэлээр орчуулагдсан/ Монгол Улсын Үндэсний номын санд, харин Өндөр гэгээн Занабазарын нэрэмжит дүрслэх урлагийн музей байгуулагдах үед түүх соёлын хосгүй үнэт бүтээл болох Өндөр гэгээн Занабазарын эх бүтээлээс язгуурын таван бурханы дөрвийг, Цагаан дарь эх болон цамын баг бүрэн өмсгөлийн хамт танка, зээгт наамлын бүтээл зэрэг олон бүтээлүүдийг шилжүүлсэн юм. Түүнчлэн Богд хааны ордон музейд 21 дарь эх болон танка, зээгт наамлын бүтээл зэргийг хүлээлгэн өгсөн билээ.

Уран барилга, өв соёл, төрийн мэлмийг хамгаалагч энэхүү Чойжин ламын музейн цогцолбор чуулганд Монголын анхдугаар Богд Өндөр гэгээн Занабазарын өөрийн мутраар урласан “Дэмчиггарав”, “Аюуш”, “Доржсэмбэ”, “Майдар”, “Рэнжүү”, “Минтүг” зэрэг сонгодог бүтээлээс эхлээд 1000 жилийн өмнө Энэтхэгт урласан хүрэл суврага, Ёнзонхамба Балданчоймболын занданшуулан хатаасан шарил зэрэг Халхын нутаг хошуудын алдартай уран гартны авьяас билэг, бурхан ухаан, сүсэг биширлээр, урлан бүтээсэн бурханы шашны түүх, соёлын үнэ цэнтэй 6500 гаруй бүтээлүүдийн дээжис хадгалагдан байдаг.

Ийнхүү илүү сартай хаврын хоног өдрүүдэд зунтай урьтаж золгосон Чойжин ламын музей надад түүхэн гарвалаа өгүүлсэн бол дараа дараагийн удаад өөрийн үнэт нандин бүтээлийн түүхийг нэг бүрчлэн дэлгэн ярихаа аминчлан шивнэлээ.

/Үргэлжлэл бий/ЗӨВЛӨХ ЗӨГИЙ сэтгүүлээс авлаа.

Зиак Ир, Үз, Сонирхо, Нэгд тэгэх үү

"Монголын Блогийн Холбоо" гэж байгуулагдаж байгааг та бүхэн блогчдын бичлэгээс, зараас мэдсэн буй за.
Ямартай ч блог бичдэг, уншдаг, хэнбугай ч басхүү бидний зорилго, хүсэл танд таалагдвал хэн ч энэхүү холбоонд элсэн, үйл ажиллагаанд нь гар бие оролцох боломжтой юм.
Дэлгэрэнгүйг Зараа, Амарсайхан ах, Гамп, Мика нарын блогоос хараарай.

Зиак уулзалтыг товыг зарлаад өгий:
2008 оны 07 сарын 18 өдөр 18.30 цагт "Хууль Зүйн Үндэсний Төв"-ийн хурлын зааланд болно.

Зүгээр л ир ... хамтдаа бүтээе.

Аан тийм. Бид гадаадад байгаа блогчдынхоо саналыг байнга Хүлээн авна. Ер нь холбооны зүгээс хийх, хийхээр төлөвлөж байгааг, хийгдэж байгаа ажлын талаарх мэдээллийг ОЙР АЛС дундын блог дээрээ тавьж байх юм.

ЭЦЭСТ НЬ ХЭЛЭХЭД, Оогийноо нь блог ертөнцөөс олон сайхан андуудтай болж, олон зүйлийг сурч мэдэж авсан. Ажлаа явуулахад минь их дөхөм болдог юм шүү.

Та ч бас өөртөө хэрэгтэй зүйлээ уулзалтаас олж, олон сайхан найзуудтай болно байхаа гэж бодож байна.
Маргааш уулзая.

Шарсан төмс

Шарсан төмс зажилах бүрийд аман дотор тос даан шарчигнах чимээ ганцхан надад ч биш эргэн тойрон дахь бүх хүмүүст сонсогдож байгаа байхдаа гэмээр тод байлаа. Гэвч тэнд надаас өөр хүн үгүй болохоор би л ганцаараа амтат шарсан төмсийг хэрхэн үйрэн бутарч байгааг сонсоно.

Бүдэгхээн гэрэлтэй баарны ширээний нэгэн буланд би ганцаараа сууна.

Энэ хүн яагаад ганцаараа суугаад байгаа юм болоо гэсэн байртай зөөгч хархүү надаас нэмэлт захиалга авахыг үл зүрхлэвч сониучирхан сонжисон байдалтай наагуур цаагуур хааяа нэг явж хоосон ширээнүүдийн тавцанг хичээнгүйлэн нямбай арчихын завсар хулгайн нүдээр намайг хяламхийн харна.
Уумаар, дуулмаар эсвэл уйлмаар ч юм шиг.

Олоон олон өдөр бужигнасан хүн хөлөөс би хэтэрхий залахснаа одоо л мэдэрч байх шиг.
Цор ганцаараа байгаад л баймаар.

Ухаантай хүний дүр эсгэх гүн ухаантнууд, өөрийн үнэнийг тулган үнэмшүүлэгчид, нээх сүрхий ажил хэрэгч дүр эсгэн хөмсөгөө атируулагчид, надаас өөр хүн энд үгүй гэж тодрогчид, дүрдээ итгэн зааж зааварлах шүүмжлэгчид ... Ёооох дандаа ухаантай хүмүүсийн дунд байх ямар хэцүү юм гэж бодогдмоор. Үнэндээ тэнэг байх нь ухаантай байхаас хавьгүй амар тайван байхаа гэж санамаар.

Нар ид шарж гадаа халуун байгаа бололтой орж гарах зөөгч хархүү хөвөн даавуун дүрэмт хувцсандаа түүртэнгүй хөдлөх аядаж, нээлттэй хаалгаар гарах бүртээ ямар нэгэн зүйлийг цухалдангуй бувтнана.
Ядаргаа ч юм уу. Ингэж байхаар гэртээ найз охиноо тэврээд л хүйтэн коло уугаад хэвтэж байхгүй гэж би өмнөөс нь бодно.

Гэтэл би гэрэлгүй шахуу гэхдээ агааржуулагчийн сэвэлзэх хиймэл салхинд сэрүүцэн баарны нэгэн буланд ширээний ард гүн бат шигдэн суугаад юу ч юм бодно.
Ганцхан зажилж буй төмсний үйрэн бутрах нь тодоос тод сонсогдоно. Жин үдийн халуунд ганцаараа харанхуй буланд шигдэн баардах нь гоё ч юм уу гэж санана.

Юу хүсээд байгаагаа мэдэхгүй, юунд дургуй хүрээд байгаагаа ойлгохгүй, яах ёстойгоо ухаарахгүй, бодохыг ч хүсэхгүй ингэж суух сайхан ч юм уу.
Шарсан төмс хайж хурууд минь цагаан тавагны ёроолоор тэнэсэн боловч шарсан төмс үлдээгүй бололтой. Амттай юм ямар хурдан дуусдаг юм вэ?
Миний авсан шарсан төмсийг хэн идчихээ вэ гэж хардангуй бодлоо.
Төмс дуусчихжээ ...

Амрах цаг болчихжээ

Үүргэвчээ үүрээд уул руу маааарш
Нээх сайхан
Цэцгийн мандал
Цэцгэнд дуртай
Байгалийн урлан
Оргил